Is í an Roinn Seirbhísí Teanga an rannóg is mó san Ionad Aistriúcháin, agus tá sí tiomanta do sheirbhísí teanga ar ardchaighdeán a sholáthar thar iliomad teangacha. Is ionann ár bhfoireann de ghairmithe oilte teanga agus níos mó ná leathchuid d’fhoireann an Ionaid Aistriúcháin.
Tá ceithre rannóg teanga sa Roinn Seirbhísí Teanga:
- Rannóg na dTeangacha Bailtice, Fionn-Úgracha agus Meánmhuirí
- Rannóg na dTeangacha Gearmáinice agus na Gaeilge
- Rannóg na dTeangacha Rómánsacha
- Rannóg na dTeangacha Slavaice
Tá idir cúig ghrúpa agus seacht ngrúpa teanga i ngach rannóg teanga, ceann amháin do gach teanga oifigiúil de chuid an Aontais. Tá éagsúlacht i méid na bhfoirne de réir ualach oibre aistriúcháin na sprioctheanga sin.
Tugann ár ngairmithe teanga faoi réimse leathan gníomhaíochtaí, lena n-áirítear aistriúchán, iar-eagarthóireacht ar mheaisínaistriúchán, fotheidealú, trascríobh agus eagarthóireacht. Cuireann siad comhairleoireacht teanga ar fáil freisin, déanann siad cuimhní aistriúcháin a chothabháil, tiomsaíonn siad gluaiseanna agus cuireann siad le bunachar téarmaí idirinstitiúideach IATE.
Baineann baill foirne tairbhe as oiliúint leanúnach le linn a ngairmeacha san Ionad, ag áirithiú go mbíonn siad cothrom le dáta i gcónaí leis an teicneolaíocht agus leis na cleachtais is déanaí. Glacann siad páirt freisin i ngníomhaíochtaí a bhaineann go sonrach le cliaint agus d’fhéadfadh sé go mbeadh an deis acu teangacha nua a fhoghlaim nó a neartú.
Ráthaíonn teangeolaithe gairmiúla an Ionaid Aistriúcháin cáilíocht na seirbhísí teanga a chuirtear ar fáil dár gcomhpháirtithe, idir sheirbhísí inmheánacha agus sheirbhísí seachfhoinsithe chuig sainsoláthraithe seachtracha seirbhíse teanga.
Agus a n-aird dírithe ar cháilíocht agus ar thiomantas maidir le feabhas leanúnach, áirithíonn an Roinn Seirbhísí Teanga go bhfaigheann ár gcomhpháirtithe seirbhísí iontaofa teanga a chuirtear in oiriúint dá gcuid riachtanas.