Is gníomhaireacht de chuid an Aontais Eorpaigh é Ionad Aistriúcháin Chomhlachtaí an Aontais Eorpaigh. Bunaíodh an tIonad i Lucsamburg in 1994, agus is é an príomh-mhisean atá aige seirbhísí aistriúcháin agus teanga a chur ar fáil do ghníomhaireachtaí díláraithe eile an Aontais. Ina theannta sin, cuidíonn sé ó am go chéile le hinstitiúidí agus le comhlachtaí den Aontas a bhfuil a seirbhísí aistriúcháin féin acu le linn tréimhsí de bhuaic-ualaí oibre nó le haghaidh tionscadail ar leith. Tá thart ar 200 ball foirne fostaithe ann faoi láthair, ina measc oifigigh, gníomhairí sealadacha agus baill foirne ar conradh.

Tá fás seasta tagtha air ó bunaíodh é, agus san am céanna tá méadú tagtha ar líon na dteangacha oifigiúla an Aontais ina gcuireann sé a seirbhísí ar fáil, agus ar líon na gcliant an-speisialaithe atá aige. Tá taithí nach beag faighte ag an Ionad ar fhreastal ar riachtanais shonracha a chliant – bíodh sí sin bainteach leis an gcineál seirbhíse, leis an bhformáid chomhaid, leis an spriocdháta, leis an réimse saineolais nó le raon leathan de phéirí teanga.

Sa lá atá inniu ann, cuireann an tIonad réimse leathan seirbhísí teanga ar fáil – rud lena bhfreastalaítear ar riachtanais éagsúla a chomhpháirtithe iomadúla. Féach liosta iomlán ár gcomhpháirtithe.

Is é dara misean an Ionaid páirt a ghlacadh i gcomhar idirinstitiúideach ar leibhéal an Aontais d’fhonn modhanna oibre a chuíchóiriú agus barainneachtaí scála a bhaint amach. Mar shampla, ó 2003 i leith, tá bunachar sonraí téarmaíochta idirinstitiúideach IATE á fhorbairt agus á bhainistiú ag an Ionad Aistriúcháin thar ceann a chomhpháirtithe institiúideacha.