Ionad Aistriúcháin Chomhlachtaí an Aontais Eorpaigh

Is sa Roinn Aistriúcháin a fhostaítear níos mó ná leath de bhaill an Ionaid Aistriúcháin, arb í an roinn is mó san Ionad. Tá sí comhdhéanta as trí Rannóg Teangacha. 

Na haistritheoirí (Rannóga Teangacha)

Tá gach Rannóg Teangacha foroinnte ina foirne aistriúcháin, foireann amháin le haghaidh gach teanga oifigiúil AE. Tá méid na bhfoirne aistriúcháin ag brath ar an ualach oibre aistriúcháin isteach i ngach sprioctheanga. Bíonn gach aistritheoir ag aistriú go dtí a t(h)eanga dhúchais; tá cúlraí acadúla éagsúla acu, dírithe ar theangacha den chuid is mó.

Cuirtear oiliúint ar fáil do na haistritheoirí feadh a saol gairmiúil san Ionad, maidir le foghlaim teanga (scileanna teanga atá ann cheana féin a fhorbairt agus teangacha nua a fhoghlaim, agus gníomhaíochtaí a bhaineann go sonrach le cliaint.

Déanann siad doiciméid agus trádmharcanna a aistriú agus a athbhreithniú. Cuireann siad fotheidil le físeáin, cuireann siad gluaiseanna le chéile agus cuireann siad le bunachar sonraí téarmaíochta idirinstitiúideach IATE.

Mar theangeolaithe, cinntíonn na haistritheoirí inmheánacha go gcuirtear aistriúcháin ar ardchaighdeán ar fáil. Is fíor sin i gcás téacsanna a aistríodh go hinmheánach agus téacsanna a chuirtear amach ar conradh do sholáthraithe seachtracha seirbhísí teanga.

Ar bhonn a mhúnla gnó atá bunaithe ar sheachfhoinsiú agus rialú cáilíochta inmheánach, tá saineolas ar leith ag an Ionad maidir le gach gné den phróiseas aistriúcháin.

Mar atá an scéal in aon eagraíocht a fheidhmíonn go héifeachtach, tá eintiteas aonair ag an Ionad Aistriúcháin atá ina cheann feadhna ar oibríochtaí, rud a chuireann an eagraíocht chun cinn. Is é sin an Roinn Tacaíochta Aistriúcháin.

Cuimsíonn an Roinn seo an Rannóg um Bainistiú Shreabhadh Oibre, an Rannóg Tacaíochta um Fhorbairt Gnó agus Sreabhadh Oibre agus an Grúpa Idirinstitiúideach IATE.

An Rannóg um Bainistiú Shreabhadh Oibre

Tá an Rannóg um Bainistiú Shreabhadh Oibre freagrach as dea-phróiseáil na n-iarratas go léir ar sheirbhísí teanga san Ionad, ón uair a fhaightear an t-iarratas go dtí go soláthraítear an táirge deiridh. Oibríonn an tIonad go príomha le creatchonarthaí.
Tá baill na Rannóige freagrach as an méid seo a leanas:

• glacadh le hiarratais, anailís a dhéanamh orthu agus iad a bhailíochtú, trí idirbheartaíocht a dhéanamh le cliaint nuair is gá;
• obair aistriúcháin, athbhreithnithe, eagarthóireachta agus téarmaíochta a shannadh d’aistritheoirí inmheánacha agus do shaoraistritheoirí;
• a chinntiú gur comhaid ineagarthóireachta iad na comhaid a mbíonn aistritheoirí ag obair orthu agus a chinntiú go bhfuil na doiciméid san fhormáid cheart sula gcuirtear ar aghaidh chuig an gcliant iad;
• úsáid a bhaint as uirlisí teicneolaíochta teanga chun comhaid a thagann isteach a láimhseáil, a mhéid is féidir;
• a chinntiú go dtugtar gach píosa oibre ar ais don iarrthóir san fhormáid cheart agus faoin spriocdháta;
• an fhaisnéis a chur le chéile a úsáidtear chun sonrascadh do na seirbhísí a chuirtear ar fáil.

Cuireann an Rannóg tacaíocht theangeolaíoch agus theicniúil ar fáil d’aistritheoirí tríd an sreabhadh oibre aistriúcháin ar fad. Ina theannta sin, cuireann sí cúrsaí oiliúna ar fáil sna réimsí éagsúla a thagann faoina cúram (e.g. úsáid teicneolaíochta).

An Rannóg Tacaíochta um Fhorbairt Gnó agus Sreabhadh Oibre

Tá roinnt fochodanna sa Rannóg Tacaíochta um Fhorbairt Gnó agus Sreabhadh Oibre:

• An fhoireann um Fhorbairt Gnó, a bhfuil sé mar aidhm aici faireachán a dhéanamh ar threochtaí agus nuálaíochtaí a bhaineann le gnó na seirbhísí teangeolaíocha (uirlisí, modhanna oibre agus seirbhísí nua) agus anailís a dhéanamh ar conas is féidir leis an Ionad cabhrú lena chliaint ar an mbealach is fearr maidir lena gcuid riachtanas cumarsáide a chomhlíonadh;
• An Fhoireann um Bainistiú Corpas agus Téarmaíochta, a dhéanann sainacmhainní agus sainuirlisí teanga a sholáthar agus a chothabháil sna réimsí seo a leanas: téarmaíocht, doiciméid tagartha, cuimhní aistriúcháin agus aistriúchán uathoibríoch;
• An Fhoireann um Thrádmharcanna agus Dearaí AE, a bhainistíonn an sreabhadh oibre ar fad a bhaineann le trádmharcanna agus dearaí AE a aistriú;

An Grúpa Idirinstitiúideach IATE

Déanann an tIonad an Grúpa Idirinstitiúideach IATE agus EurTerm (an t-ardán comhoibritheach idirinstitiúideach do théarmeolaithe) a óstáil ar son na gcomhpháirtithe tionscadail IATE. 

Cuireann an Roinn Riaracháin tacaíocht riaracháin agus theicniúil ar fáil sna réimsí d’acmhainní daonna (AD), pleanáil buiséid agus straitéise, gnóthaí dlí, iarratais ar thairiscintí, saoráidí agus slándáil.

An Grúpa Airgeadais

Cinntíonn an Grúpa Airgeadais go bhfeidhmíonn bainistíocht airgeadais an Ionaid mar is ceart agus go gcomhlíontar na rialacha agus na rialúcháin is infheidhme. Déanann sé ullmhúchán agus iarchúram ar bhuiséad an Ionaid Aistriúcháin a chomhordú agus bíonn siad i ndlúth-theagmháil le cliaint an Ionaid ar bhonn rialta chun go bhféadfaí a réamhaisnéis buiséid a chur i gcuntas i mbuiséad ioncaim an Ionaid Aistriúcháin. Cúram tábhachtach eile is ea fíorú ex ante agus ex post na n-idirbheart airgeadais.

An Rannóg um Phleanáil Straitéiseach

Ullmhaíonn an Rannóg um Phleanáil Straitéiseach Clár Straitéise Ilbhliantúil agus Clár Oibre Ilbhliantúil an Ionaid agus cuireann sí na cláir sin i bhfeidhm agus déanann sí ullmhú na Tuarascála Gníomhaíochta Bliantúla a chomhordú. Ina theannta sin, déanann sí bainistíocht riosca agus rialú inmheánach a chomhordú agus a mhonatóiriú.

An Rannóg Gnóthaí Dlí

An Rannóg Saoráidí agus Slándála

Cinntíonn an Rannóg Saoráidí agus Slándála go bhfuil cosaint shásúil ann d’fhoireann, sonraí, foirgnimh agus trealamh an Ionaid i gcoinne aon rioscaí slándála agus go gcomhlíontar rialacha sláinte agus sábháilteachta. Déanann an Grúpa bainistíocht ar mhaoin sochorraithe agus maoin dochorraithe agus bíonn sé freagrach as leanúnachas gnó a chomhordú sa chás de bhriseadh isteach suntasach ar oibríochtaí an Ionaid, rud nach dtarlaíonn go minic. Ina theannta sin, cuireann an Grúpa bearta neamhdhíobhálacha don chomhshaol chun cinn san Ionad agus ardaíonn sé feasacht na foirne ar chúrsaí a bhaineann le bainistíocht dramhaíola.

An Rannóg Acmhainní Daonna

Déanann an Rannóg Acmhainní Daonna beartais AD a fhorbairt, a chomhordú agus a chur i bhfeidhm agus cuireann sí comhairle agus treoirlínte ar fáil do bhainistíocht agus baill foirne an Ionaid ar chúrsaí AD. Go sonrach, baineann a ról le baill foirne agus daoine faoi oiliúint a roghnú, a earcú agus a fhorbairt ina ngairmeacha (oiliúint, bainistíocht scileanna, breithmheas agus ardú céime). Tá an Rannóg freagrach freisin as ceisteanna buiséid agus airgeadais a bhaineann le caiteachas na foirne.

Is ríthábhachtach é feidhmchláir ríomhaireachta agus trealamh úrscotha a bheith ar fáil d’obair an Ionaid ó lá go lá. Tá trí rannán sa Roinn Teicneolaíocht Faisnéise: An Deasc Chabhrach, Bonneagar TF, Forbairt agus an Oifig Bhainistíochta Tionscadail.

Oifig Bhainistíochta Tionscadail

Déanann an Oifig comhordú ar thionscadail straitéiseacha i ranna agus rannóga an Ionaid. Ar an gcaoi sin, cinntítear go gcuirtear chun feidhme réitigh ghnó go rathúil inbhuanaithe. Ar an gcaoi sin, cuirtear feabhas ar sheirbhísí do chliaint agus baill foirne inmheánacha.

An Rannóg Forbartha

Déanann an Rannóg Forbartha feidhmchláir TF agus bunachar sonraí a dhearadh, a chruthú agus a chothabháil de réir riachtanas reatha an Aonaid Aistriúcháin.

Chomh maith leis sin, déanann an rannóg réitigh TF agus seirbhísí a fuarthas ó sholáthraithe seachtracha a bhainistiú, ar nós iad siúd a sholáthraíonn institiúidí eile nó cuideachtaí príobháideacha, agus cabhraíonn sí na réitigh sin a chur chun feidhme i dtimpeallacht TF an ionaid.

Rannóg na Deisce Cabhrach

Is í Rannóg na Deisce Cabhrach an pointe teagmhála aonair d’úsáideoirí inmheánacha agus seachtracha chun déileáil le gach cineál ceist agus iarratas faisnéise a bhaineann le réimsí éagsúla TF: crua-earraí, bogearraí, teileachumarsáid agus bonneagar. Láimhseálann an Rannóg na crua-earraí agus bogearraí pearsanta agus na réitigh gnó chun ailtireacht chomhsheasmhach chumhachtach TF a chur ar fáil do gach stáisiún oibre.

An Rannóg Bonneagair TF

Cuireann an Rannóg Bonneagair TF an bonneagar lárnach TF ar fáil agus déanann sí an bonneagar a chothabháil chun comhlíonadh spriocanna an Ionaid a éascú. Ina theannta sin, cinntíonn sí athléimneacht an bhonneagair trí Phlean Leanúnachais agus Athshlánaithe. Déanann an Rannóg maoirseacht ar infhaighteacht agus slándáil na sonraí a bhaineann leis an Ionad agus na sonraí a chuireann a gcliaint agus comhpháirtithe ar fáil, agus bainistíonn sí na hionaid sonraí agus seirbhísí néil a theastaíonn le haghaidh oibríochtaí an Ionaid. Cuireann an Rannóg a ngníomhaíochtaí i gcrích i ndlúthchomhar leis an Oifigeach um Chosaint Sonraí, an Oifigeach Slándála agus an Oifigeach Slándála Teicneolaíochta Faisnéise Áitiúil.