Iċ-Ċentru tat-Traduzzjoni jirrekluta fornituri ta’ lingwi esterni b’mod esklussiv permezz ta’ proċeduri ta’ offerti formali, li jiġu ppubblikati fuq TED, il-pjattaforma għall-akkwist elettroniku u fuq is-sit web taċ-Ċentru. Madankollu, fuq bażi eċċezzjonali ħafna (speċjalment, iżda mhux limitat għal, dominji mhux tas-soltu u/jew kombinazzjonijiet lingwistiċi) nassenjaw servizzi lingwistiċi differenti bi proċedura nnegozjata (kuntratti speċifiċi), sakemm il-kundizzjonijiet li ġejjin jiġu ssodisfati:
1. Inti bbażat fi Stat Membru tal-UE, jew
2. Inti ċittadin tal-UE li tgħix fi Stat mhux Membru tal-UE u taħdem bħala ħaddiem freelance (aġenziji mhux ibbażati fl-UE ma jaqgħux f’din il-kategorija).
Jekk tissodisfa l-kriterji msemmija hawn fuq u toffri servizzi ta’ traduzzjoni, editjar (reviżjoni monolingwi ta’ test), posteditjar (posteditjar komplet u ħafif), sottotitolar jew traskrizzjoni minn u għal lingwi tal-UE, jekk jogħġbok segwi din il-paġna. Aħna npoġġu kwalunkwe pożizzjoni vakanti li tista’ tinħoloq minn żmien għal żmien biex jiġu ssodisfati l-ħtiġijiet tagħna, bi struzzjonijiet dovuti dwar il-mod kif wieħed għandu japplika biex isir fornitur ta’ servizzi lingwistiċi għaċ-Ċentru tat-Traduzzjoni skont proċeduri nnegozjati.
Jekk jogħġbok innota li ċ-Ċentru tat-Traduzzjoni attwalment mhux qed ifittex fornituri ta’ servizzi lingwistiċi u għaldaqstant l-applikazzjonijiet spontanji mhumiex qed jiġu aċċettati aktar.
Lingwi mhux tal-UE
Iċ-Ċentru tat-Traduzzjoni qed ifittex ukoll fornituri tal-lingwi li jistgħu jaħdmu f’pari ta’ lingwi mil-lingwi tal-UE għal lingwi mhux tal-UE (inklużi lingwi reġjonali u minoritarji) jew minn lingwi mhux tal-UE għal lingwi mhux tal-UE (eż. miċ-Ċiniż għall-Ġappuniż). Għal kombinazzjonijiet lingwistiċi bħal dawn (lingwi tal-UE għal lingwi mhux tal-UE u lingwi mhux tal-UE għal lingwi mhux tal-UE), inħeġġu liċ-ċittadini tal-UE u lill-fornituri ta’ servizzi lingwistiċi biex ukoll jagħmlu kuntatt magħna billi jsegwu l-proċedura msemmija hawn fuq (il-punti 1 u 2).
Protezzjoni tad-data
Id-data personali sottomessa fis-CV tiegħek u l-formola tal-applikazzjoni mimlija jiġu pproċessati f’konformità mar-Regolament (UE) 2018/1725 tal-Parlament Ewropew u tal-Kunsill tat-23 ta’ Ottubru 2018 dwar il-protezzjoni ta’ persuni fiżiċi fir-rigward tal-ipproċessar ta’ data personali mill-istituzzjonijiet, korpi, uffiċċji u aġenziji tal-Unjoni u dwar il-moviment liberu ta’ tali data.
Iċ-Ċentru jipproċessa din id-data biss biex janalizza l-applikazzjoni tiegħek sabiex jirreġistra l-fornituri ta’ servizzi lingwistiċi fil-bażi tad-data. Il-formoli jinżammu għal perjodu massimu ta’ 12-il xahar wara li jaslu u jinqerdu/jitħassru wara dik id-data.
Għal dettalji dwar l-ipproċessar tad-data personali tiegħek, jekk jogħġbok ikkuntattja liċ-Ċentru (freelance-database@cdt.europa.eu) jew lill-Uffiċjal tal-Protezzjoni tad-Data taċ-Ċentru (data-protection@cdt.europa.eu).