Ċentru tat-Traduzzjoni għall-korpi tal-Unjoni Ewropea

Id-Dipartiment tat-Traduzzjoni huwa l-akbar dipartiment taċ-Ċentru tat-Traduzzjoni, li jammonta għal aktar min-nofs il-persunal taċ-Ċentru. Huwa magħmul minn tliet Sezzjonijiet Lingwistiċi.

Kull Sezzjoni Lingwistika hija subdiviża f’timijiet tat-traduzzjoni, wieħed għal kull lingwa uffiċjali tal-UE. Id-daqs ta’ kull tim ivarja skont l-ammont ta’ xogħol ta’ traduzzjoni f’kull lingwa fil-mira. It-tradutturi kollha jittraduċu għal-lingwa materna tagħhom; huma għandhom sfond akkademiku varjat, fil-biċċa l-kbira orjentat lejn il-lingwi.

It-tradutturi jiġu offruti taħriġ matul il-ħajja professjonali tagħhom fiċ-Ċentru, kemm f’termini ta’ tagħlim tal-lingwi (l-iżvilupp tal-ħiliet lingwistiċi eżistenti u l-kisba ta’ lingwi ġodda), kif ukoll f’attivitajiet speċifiċi għall-klijenti.

Huma jittraduċu u jirrevedu dokumenti kif ukoll trademarks. Huma jagħmlu wkoll is-sottotitoli ta’ vidjos, jikkompilaw glossarji u jikkontribwixxu għall-bażi tat-termini interistituzzjonali tal-IATE.

Bħala lingwisti, it-tradutturi interni jiggarantixxu l-kwalità lingwistika tat-traduzzjonijiet ipprovduti. Dan huwa minnu kemm għat-testi tradotti internament kif ukoll għat-testi li jkunu esternalizzati lill-fornituri tas-servizzi lingwistiċi esterni speċjalizzati.

Permezz tal-mudell tan-negozju tiegħu bbażat fuq il-kontroll tal-kwalità interna u dik tal-esternalizzazzjoni, iċ-Ċentru sar punt ta’ referenza għall-aspetti kollha tal-proċess ta’ reviżjoni.

Organizzazzjonijiet li jimxu bla xkiel ġeneralment ikollhom entità unika fil-qalba tal-operazzjonijiet biex tiffunzjona bħala l-forza tat-tmexxija. Fiċ-Ċentru tat-Traduzzjoni, dan huwa r-rwol tad-Dipartiment ta’ Sostenn għat-Traduzzjoni.

Dan id-Dipartiment jikkonsisti mis-Sezzjoni tal-Ġestjoni tal-Fluss tax-Xogħol, is-Sezzjoni ta’ Soluzzjonijiet Avvanzati tal-Lingwa u s-Sostenn għall-Fluss tax-Xogħol u l-Grupp Interistituzzjonali tal-IATE.

Is-Sezzjoni tal-Ġestjoni tal-Fluss tax-Xogħol

Is-Sezzjoni tal-Ġestjoni tal-Fluss tax-Xogħol hija l-punt ta’ kuntatt operazzjonali uniku għall-klijenti. Għaldaqstant hija responsabbli mill-ipproċessar ordnat tat-talbiet għas-servizzi lingwistiċi kollha, mill-wasla tat-talba sal-konsenja tal-prodott finali. Din tiġġestixxi wkoll il-feedback tal-klijenti.
Il-membri tas-sezzjoni jwettqu l-kompiti li ġejjin:

• jirċievu, janalizzaw u jivvalidaw it-talbiet, fejn meħtieġ permezz ta’ negozjati mal-klijenti;
• jassenjaw xogħlijiet ta’ traduzzjoni, reviżjoni, editjar u terminoloġija lil tradutturi interni u freelance;
• jiżguraw li l-fajls għat-tradutturi jkunu f’forma li tista’ tiġi editjata u li d-dokumenti għall-klijenti huma fformattjati b’mod korrett qabel il-konsenja;
• jużaw għodod tat-teknoloġija lingwistiċi għat-trattament sħiħ minn qabel ta’ fajls li jidħlu;
• jiżguraw li x-xogħlijiet kollha jaslu lura għand min ikun għamel it-talba sad-data ta’ skadenza miftiehma u fil-format meħtieġ;
• jikkumpilaw l-informazzjoni meħtieġa biex jiġu fatturati s-servizzi pprovduti;
• jindirizzaw l-feedback tal-klijenti permezz tal-funzjonalità tat-Talba għal Verżjoni Korretta (CVR).

Is-sezzjoni hija wkoll is-sid tan-negozju tal-Portal tal-Klijenti.

Is-sezzjoni tipprovdi sostenn lingwistiku u tekniku lit-tradutturi matul il-fluss tax-xogħol tat-traduzzjoni. Barra minn hekk, tipprovdi korsijiet ta’ taħriġ fid-diversi oqsma li tkopri (eż. l-użu tat-teknoloġija).

Taqsima ta’ Soluzzjonijiet Avvanzati tal-Lingwa

Is-Sezzjoni ta’ Soluzzjonijiet Avvanzati tal-Lingwa tikkonsisti f’diversi sottokomponenti:

• it-Tim tat-Teknoloġija tal-Lingwa, li jimmonitorja x-xejriet u l-innovazzjonijiet relatati man-negozju tas-servizzi lingwistiċi, janalizza kif iċ-Ċentru jista’ jgħin bl-aħjar mod lill-klijenti tiegħu jissodisfaw il-ħtiġijiet ta’ komunikazzjoni tagħhom u jiżviluppa u jappoġġja t-traduzzjoni awtomatika u s-servizzi ta’ rikonoxximent awtomatiku tad-diskors;
• it-Tim tal-Ġestjoni tat-Terminoloġija, li jipprovdi u jmantni riżorsi u għodda speċjalizzati tal-lingwa fil-qasam tat-terminoloġija;
• it-Tim tat-Trademarks u d-Disinji tal-UE, li jiġġestixxi l-fluss tax-xogħol kollu kemm hu għat-traduzzjoni tat-trademarks u d-disinji tal-UE;
• l-Uffiċċju tal-Ġestjoni tal-Proġetti (PMO), li jikkoordina proġetti strateġiċi fid-dipartimenti u s-sezzjonijiet differenti taċ-Ċentru, biex b’hekk jiżgura li s-soluzzjonijiet effettivi tan-negozju jiġu implimentati b’suċċess u b’mod sostenibbli, li jwassal għal titjib fis-servizzi kemm għall-klijenti kif ukoll għall-persunal intern.

Il-Grupp Interistituzzjonali tal-IATE

Il-Grupp Interistituzzjonali tal-IATE u l-Koordinatur tal-EurTerm (il-pjattaforma kollaborattiva interistituzzjonali għat-terminoloġisti) huma ospitati miċ-Ċentru f’isem is-sħab tal-proġett tal-IATE. 

Id-Dipartiment tal-Amministrazzjoni jipprovdi sostenn amministrattiv u tekniku fl-oqsma tar-riżorsi umani (HR), l-ippjanar baġitarju u strateġiku, l-affarijiet legali, is-sejħiet għall-offerti, il-faċilitajiet u s-sigurtà.

Il-Grupp Finanzjarju

Il-Grupp Finanzjarju jiżgura li l-ġestjoni finanzjarja taċ-Ċentru tiffunzjona kif suppost u li hi konformi mar-regoli u r-regolamenti applikabbli kollha. Dan jikkoordina l-istabbiliment u s-segwitu tal-baġit taċ-Ċentru u jżomm kuntatt mill-qrib mal-klijenti taċ-Ċentru sabiex jinkorpora l-previżjonijiet baġitarji tagħhom fil-baġit tad-dħul taċ-Ċentru. Kompitu importanti ieħor huwa l-verifika ex ante u ex post tat-tranżazzjonijiet finanzjarji.

Is-Sezzjoni tal-Ippjanar Strateġiku

Is-Sezzjoni tal-Ippjanar Strateġiku tħejji u timplimenta l-Istrateġija Pluriennali u l-Programmi ta’ Ħidma Pluriennali taċ-Ċentru, u tikkoordina t-tħejjija tar-Rapport Annwali tal-Attività. Barra minn hekk, din tikkoordina u timmonitorja wkoll l-implimentazzjoni tal-ġestjoni tar-riskji u l-kontroll intern.

Is-Sezzjoni tal-Affarijiet Legali

Is-Sezzjoni tal-Faċilitajiet u s-Sigurtà

Is-Sezzjoni tal-Faċilitajiet u s-Sigurtà tiżgura li l-persunal, id-data, il-binjiet u t-tagħmir taċ-Ċentru huma protetti b’mod adegwat kontra kwalunkwe riskju għas-sigurtà u li r-regoli tas-saħħa u s-sigurtà jkunu obduti. Il-Grupp jiġġestixxi l-proprjetà mobbli u immobbli u huwa responsabbli mill-koordinazzjoni tal-kontinwità tan-negozju f’każ rari ta’ tfixkil kbir fl-operat taċ-Ċentru. Barra minn hekk, il-Grupp jippromwovi miżuri li jirrispettaw l-ambjent fiċ-Ċentru u joħloq sensibilizzazzjoni tal-persunal dwar l-immaniġġar tal-iskart.

Is-Sezzjoni tar-Riżorsi Umani

Is-Sezzjoni tar-Riżorsi Umani tiżviluppa, tikkoordina u timplimenta l-politiki tal-HR, u tipprovdi pariri u linji gwida lill-maniġment u l-persunal taċ-Ċentru dwar kwistjonijiet tal-HR. B’mod partikolari, ir-rwol tagħha huwa relatat mal-għażla, ir-reklutaġġ u l-iżvilupp tal-karriera tal-persunal u t-trainees (taħriġ, ġestjoni tal-ħiliet, evalwazzjoni u promozzjoni). Is-Sezzjoni hija inkarigata wkoll mill-kwistjonijiet baġitarji u finanzjarji relatati mal-infiq tal-persunal.

Applikazzjonijiet u tagħmir tal-kompjuter tal-ogħla livell huma essenzjali għax-xogħol ta’ kuljum taċ-Ċentru. Id-Dipartiment tal-IT jinkludi t-tliet sezzjonijiet li ġejjin: Service Desk, Infrastruttura tal-IT, Żvilupp.

Sezzjoni tal-Iżvilupp

Is-Sezzjoni tal-Iżvilupp tiddisinja, toħloq u żżomm applikazzjonijiet u bażijiet ta’ data tal-IT kif meħtieġ għat-tmexxija taċ-Ċentru.

Timmaniġġja wkoll soluzzjonijiet u servizzi tal-IT mhux interni akkwistati minn fornituri esterni, bħal dawk fornuti minn istituzzjonijiet oħra jew kumpaniji privati, u tikkontribbwixxi sabiex tagħmel riċerka dwarhom, tintegrahom u timplimentahom fl-ambjent tal-IT taċ-Ċentru.

Sezzjoni tas-Service Desk

Is-Sezzjoni tas-Service Desk hija l-uniku punt ta’ kuntatt kemm għall-utenti in-house kif ukoll għal dawk esterni fl-indirizzar ta’ kull tip ta’ kwistjoni u talba għal informazzjoni relatata mal-oqsma varji tal-IT: ħardwer, softwer, telekomunikazzjoni u infrastruttura. Tiġġestixxi l-ħardwer, is-softwer u s-soluzzjonijiet tan-negozju personali kollha sabiex tipprovdi arkitettura tal-IT konsistenti u b’saħħitha f’kull post tax-xogħol.

Sezzjoni tal-Infrastruttura tal-IT

Is-Sezzjoni tal-Infrastruttura tal-IT tforni u żżomm l-infrastrutturi ċentralizzati tal-IT li jippermettu liċ-Ċentru jissodisfa l-għanijiet tiegħu, u tiżgura li dawn l-infrastrutturi huma reżiljenti permezz ta’ Pjan ta’ Kontinwità u Rkupru. Tissorvelja d-disponibbiltà u s-sigurtà tad-data li għandha x’taqsam maċ-Ċentru u tad-data pprovduta mill-klijenti u l-imsieħba, u timmaniġġja ċ-ċentri tad-data u s-servizzi ta’ cloud li jakkomodaw il-kapaċità tal-ħżin u l-ipproċessar meħtieġa għall-operat taċ-Ċentru. Din is-sezzjoni twettaq l-attivitajiet kollha tagħha f’kollaborazzjoni mill-qrib mal-Uffiċjal tal-Protezzjoni tad-Data, l-Uffiċjal tas-Sigurtà u l-Uffiċjal tas-Sigurtà għall-Informatika Lokali.